राजधानीमा आजबाट सुपथ मूल्य पसल सञ्चालन

काठमाडौँ– कोरोना भाइरसका कारण ६ महिना लामो बन्दाबन्दी खुकुलो बनाएसँगै राजधानी काठमाडौँमा मानिसहरुको चहलपहल बढेको छ ।

कोभिडका कारण यसअघिका चाडपर्व राम्रोसँग मनाउन नपाए पनि नजिकिँदै गरेको दशैं तिहार लगायतका चाडपर्व मनाउन पाइन्छ कि भन्ने मानिसहरुको आश छ ।

दशैं आउन एक महिना मात्र बाँकी छ । अन्य वर्षहरुमा झैं यसवर्ष पनि दशैं लक्षित बजार खुल्न थालेका छन् । विशेषगरी सरकारी स्वामित्वका संस्थानहरुले सुपथ मूल्य पसलहरु सञ्चालनमा ल्याएका छन् ।

आजबाट सरकारले चाडपर्वलक्षित सुपथ मुल्यका पसल सञ्चालनमा ल्याएका छन् । दशैं, तिहार तथा छठजस्ता चाडपर्वमा उपभोक्तालाई राहत दिनका लागि उपत्यकालगायत बाहिरी जिल्लाहरुमा सरकारले सुपथ मूल्य पसल सञ्चालनमा ल्याएको हो ।

उद्योग वाणिज्य तथा आपुर्ती मन्त्रालयकाअनुसार विगतका वर्षहरुमा झैं यसवर्ष पनि खाद्य व्यवस्था तथा व्यापार कम्पनी लिमिटेड र साल्ड ड्रेडिङ कर्पोरेसनले आफ्ना बिक्री कक्षबाट उपभोक्तालाई सुपथ मूल्यमा सामग्री उपलब्ध गराउन थालेका छन् ।

खाद्यन्न अर्डर गर्नुस्, होमडेलिभरी हुन्छ

आजबाट सञ्चालनमा आएका सुपथ मुल्य पसलहरु छठको भोलिपल्टसम्म निरन्तर सञ्चालनमा रहने खाद्य व्यवस्था तथा व्यापार कम्पनीले जनाएको छ ।

कोभिड १९ का कारण कम्पनीले केही महिनाअघिबाट अनलाईन डेलिभरी समेत दिदैं आइरहेको छ । ‘यस कार्यलाई निरन्तरता दिदैं चाडपर्वका समयमा पनि उपभोक्ताले अनलाईनमार्फत सामग्री अर्डर गर्न सक्नुहुनेछ’ कम्पनीकी सुचना अधिकारी सर्मिला न्यौपानेले भनिन् ।

लकडाउनबाटै थालिएको अनलाईन डेलिभरीले पनि राम्रो मार्केट लिना थालेका बताउँछिन् उनी, भन्छिन्, ‘उपभोक्तालाई पहिलेझैं नेपाल फुड डट जिओभि डटएनपी मा गएर अर्डर गर्न सक्नुहुनेछ’ ।

पहिलो चरणमा काठमाडौंको चक्रपथभित्रका बासिन्दाका लागि मात्र लक्षित गरेर खोलिएको भएपनि अहिले उपत्यकाभर र सुर्खेतमा पनि अनलाईन अर्डर र डेलिभरीको काम भइरहेको उनले जानकारी दिइन् ।

सोना मनसुली र जिरा मनसुली चामल, चिनीलगायतका खाद्य सामग्री चाडपर्वमा अनलाईनमार्फत उपभोक्ताको अर्डर डेलिभरी गर्ने योजना कम्पनीको रहेको छ ।

‘उनकाअनुसार चाडपर्वमा उपभोक्तालाई राहत दिनका लागि उपत्यकासँगै बाहिरी जिल्लामा पनि सुपथ मुल्य पसल सञ्चालनमा आएका छन् । सुपथ मुल्य पसलमा चिनीमा प्रतिकेजी ५ रुपैयाँ, चामलमा प्रतिकेजी पाँच रुपैयाँ र नुनमा प्रतिकेजी दुई रुपैयाँ छुट हुनेछ’ न्यौपानेले खबरहबसँग भनिन् ।

चाडपर्वलाई लक्षित गर्दै बजार अनुगमन सुरु

वाणिज्य, आपुर्ती तथा उपभोक्ता संरक्षण विभागले चाडपर्व लक्षित विभिन्न १० वटा टोली गठन गरी एकसाता अघिबाट बजार अनुगमन गरिरहेको छ ।

चाडपर्वको समयमा व्यापारीहरुले जथाभावी मुल्य लिने, म्याद गुज्रिएको अखाद्य वस्तुलाई बेच्ने लगायतका समस्या देखिने गरेकाले दशैं आउन झण्डै १ महिना बाँकी हुँदै अनुगमन सुरु गरेको विभागका महानिर्देशक नेत्रप्रसाद सुवेदीले जानकारी दिए ।

‘विभागको टोलीले हाल खाद्यन्न, इन्धन, लत्ताकपडा, उिने पानी, तरकारी, माछामासु, फलफुल लगायतका थोक तथा खुद्रा पसलमा अनुगमन गरिरहेको छ’ सुवेदीले भने, ‘खासगरी काठमाडौँको कलंकी, बालाजु, बुढानिलकण्ठ, महाराजगञ्ज, चावहिल, कोटेश्वर, भक्तपुर र ललितपुरका विभिन्न स्थानमा टोली परिचालन गरेका छौं ।’

Leave a Reply

Your email address will not be published. Required fields are marked *